Петропавлда адам саудасымен және оларды пайдаланумен айналысқан Ақмола облысының тумасы ұсталды.
ІІМ ұйымдасқан қылмысқа қарсы күрес департаментінің бастығы Қанат Нұрмағамбетов күдіктінің әлеуметтік желілер арқылы толық емес отбасылардан шыққан, материалдық жағдайы төмен қыздарды, оның ішінде кәмелетке толмағандарды іздегенін хабарлады.
«Қылмыстық ниетті жүзеге асыру үшін олармен танысып, жұмыс іздеуге көмек көрсету сылтауымен алдау және сенімін асыра пайдалану арқылы Петропавлға шақырған. Олар келгеннен кейін психологиялық қысым көрсетіп, қарсылығын басып, қауіп-қатер мен физикалық зорлық-зомбылық жасап, саудалаған»,
деді Нұрмағамбетов.
Аталған схема бойынша күдікті Қостанайдың 19 жастағы тұрғынын жалдап, оны сауналар мен қонақ үйлерде одан әрі жыныстық пайдалану үшін 250 мың теңгеге сатты. Жәбірленуші қажетті көмек көрсету үшін арнайы мекемеге орналастырылды.
Бұл факт Қылмыстық кодекстің 128-бабы, 1-бөлігі «Адам саудасы» бойынша тіркелген.
Фото: Unsplash/ Louis Galvez
