Гүлзира Айдарбекова қамауға алынған ұлын сағынып, аңсап жүр — Қайрат Нұртастың анасы және продюсері кезекті Instagram-жазба жариялады.
Қайрат Нұртас қайтадан ұсақ бұзақылық жасағаны үшін қамауға алынғаннан бері оның анасы және продюсері Гүлзира Айдарбекова күн сайын атақты ұлының фотосуреттері мен видеоларын жариялап келеді. Өзінің уайымы жайлы айтып, қазіргі жағдай туралы барлық жағынан ойын білдіруде. Айдарбекова Қайрат Нұртастың жанкүйерлеріне отбасына үлкен қолдау көрсеткені үшін алғысын білдірді.
«Әшейінде «күндер зулап өтіп бара жатыр» деп ренжуші едім... Кім ойлаған таңым да атпай, кешім де батпай, тоқтап қалғандай боларын. Әр сағат пен өткен күнді санап басым қатты. Алла күш-қуат берсін! Толассыз ағылып жатқан хаттарыңыз үшін аналық жүрегіммен алғысымды айтамын! Сынақ қой, ештеңе етпес, сіздер де жігерлі болыңыздар! Кімнің басынан не өтпейді, иә, бұлт артынан күн шығатынын ұмытпайық! Бес саусақ бірдей емес, бір ананың баласы мүгедек, бірі баласынан айырылып жатыр, бірі перзент сүйе алмай жүр, соның бәрін Алла тәубесіне келсін деп көзіңе көрсетіп қояды екен»,
деп жазды продюсер.
Айдарбекова сондай-ақ Қайрат Нұртастың қамауға алынғаннан кейін өзін қалай сезінетінін айтты.
«Ия тәуба, ең бастысы балам аман! Ер азамат қой, тағдырына көнеді, шыдайды,өзі әндеріне қосып айтқандай Шыда жүрек! Көз жастарыңыз тек қуаныштан болсын!» – деп қорытындылады Гүлзира Айдарбекова.
Фото: Instagram
