Pexels: mododeolhar
Адамның сенімге лайық емес екенін дер кезінде байқай білу — өмір бойы дамытуды қажет ететін маңызды дағды. Бұл сені көңіл қалудан, уақыт пен ресурс жоғалтудан сақтайды.
Төменде сенімге лайық емес адамды тануға көмектесетін 5 белгі келтірілген.
1. Оның әңгімелерінде қайшылық көп
Иә, адамның жады — ең сенімді құрал емес. Уақыт өте келе есте қалған жайттар бұрмалануы мүмкін. Бірақ, бір адамның әңгімесінде қайшылықтар үнемі кездесіп тұрса, бұл күмән туғызуы керек. Ол өз мақсатына жету үшін жағдайды бұрмалауы мүмкін. Мақсаты — сенің ойыңды басқару не ерекше әсер қалдыру арқылы өз пайдасына шешім шығарту.
Фактілермен расталатын, тек субъективті көзқарасқа емес, шындыққа сүйенетін адамдарға сенім артқаның жөн. Бұл көптеген қиындықтар мен көңіл қалудан қорғайды.
2. Ол кінәні өз мойнына алмайды
Мұндай мінез-құлық иесін эмоционалды жетілмеген адам деуге болады. Ол өз әрекеттерін саралай алмайды, кінәні мойындауға қабілетсіз және жиі манипуляцияға жүгінеді.
Мәселен, ол өз қателіктерінен сабақ алмайды, өзгені жанжалға тартады, шындықты өзіне тиімді етіп бұрмалайды және өзгелерге кінә арту арқылы оларды бақылауда ұстағысы келеді.
3. Көп өсек айтады
Өсекшілер өзгелердің жағдайына шын жанашырлықпен қарамайды. Керісінше, олар таныстарының басына түскен қиындықтарды талқылаудан ләззат алады. Мұндай адамдар ақпаратты қысым көрсету құралы ретінде пайдаланып, қай жерде жүрсе де шиеленісті жағдай туғызуы мүмкін.
Егер осындай адаммен араласуды жалғастыра берсең, өзіңе зиян тигізесің. Себебі, бүгін сенімен біреуді талқылаған адам ертең сен туралы басқаларға айтуы мүмкін.
4. Жауапкершіліктен қашады
Жауапкершіліктен жалтаратын адамды шынайы жетілген тұлға деп айту қиын. Ол жиі тәртіпсіздік пен белгісіздік туғызады, эмоциялық манипуляцияға жүгінеді және болжай алмайтын мінез көрсетеді. Сондай-ақ, мұндай адам өз қателіктерінен сабақ алмайды, өзгелерге құрметпен қарамайды.
Өз әрекетіне жауап бере алмайтын адам сенің сеніміңе лайық емес. Осыны есте сақта және маңызды дүниелермен тек сенімді адаммен бөліс.
5. Өзгелердің жеке шекарасын бұзады
Егер танысың сенің немесе басқалардың жеке кеңістігін үнемі бұза берсе, ол — өзгелерді құрметтемейтін, өз билігін жүргізгісі келетін адам. Мұндай адамдар басқаларды басқаруды қалайды, манипуляцияны жиі қолданады және құпия ақпаратты өз пайдасына қолданады.
Бұған көз жұмып қарауға болмайды. Егер біреу сенің жеке шекараңды елемесе, міндетті түрде өз наразылығыңды білдір. Егер үнсіз қалсаң, болашақта эмоциялық қысымға ұшырауың мүмкін.
Фото: Pexels
Дереккөз: HEROINE
